ஏழைகளின் கோவா - மணப்பாடு ,தூத்துக்குடி 

தூத்துக்குடி மாவட்டம் திருச்செந்தூர் அருகே அமைந்திருக்கும் அழகிய கடற்கரை கிராமம் மணப்பாடு . திருச்செந்தூர் -கன்னியாகுமரி சாலையில் உடன்குடி அருகே அமைந்துள்ளது மணப்பாடு. மணப்பாடு அருகே குலசை முத்தாரம்மன் கோவில் அமைந்துள்ளது.இக்கோவில் தசராதிருவிழா உலகப்புகழ்பெற்றது .

மணப்பாடு ஏழைகளின் கோவா என்று அழைக்கப்படுகிறது. இயற்கையிலேயே அழகு நிறைந்த மணப்பாடு கடல் ஒருபுறம் அமைதியாகவும், மற்றொரு புறம் ஆர்ப்பரிக்கும் அலைகளுடன் காணப்படும். மணப்பாடு கடற்கரையில் கடல்சார் விளையாட்டுப் போட்டிகள் நடத்த சிறப்பான இடமாக தேர்வு செய்யப்பட்டு இந்தியாவிலேயே ஒரே நேரத்தில் ஐந்து கடல்சார் விளையாட்டுப் போட்டிகள் நடத்தப்பட்டு வருகிறது.  

அலைசறுக்கு போட்டி நடத்த தமிழ்நாட்டிலே மிக சிறந்த கடற்கரையாக மணப்பாடு இருப்பதாக தமிழக சுற்றுலாத் துறை ஆணையர் ஹர்சஹாய் மீனா தெரிவித்துள்ளார். இந்தியாவில் மிக சிறந்த 5 கடற்கரைகளில் இதுவும் ஒன்று.

மூன்று புறமும் கடலால் சூழப்பட்டிருக்கும் . ஒருபுறமும் மிகப்பெரிய மணல் குன்று இருக்கும். இந்த மணல் மேட்டில் மத்திய அரசு கட்டுப்பாட்டில் செயல்படும் கலங்கரை விளக்கு, கண்காணிப்பு காமிரா உள்ளது.

மணப்பாட்டின் தேவாலயம் அமைந்துள்ள மணல் குன்றில் இருந்து பார்த்தால் ஒட்டுமொத்த அழகையும் ரசிக்கலாம். இந்த அழகை பார்த்துதான் மணப்பாட்டில் பல தமிழ் திரைப்படங்கள் எடுக்கப்பட்டுள்ளன. குறிப்பாக 'இயற்கை' திரைப்படத்தின் கிளைமேக்ஸ் பாடல், நீர் பறவை, மணிரத்தினத்தின் கடல், ஜீவா, நீதானே என் பொன்வசந்தம், போன்ற மைல் கல் பதித்த பல திரைப்படங்கள் மணப்பாட்டில் படமாக்கப்பட்டவை ஆகும்.

உலகிலேயே மணப்பாட்டில் மட்டும்தான் ஒரே நேரத்தில் பாய் படகு ஓட்டம், அலைச்சறுக்கு ஓட்டம், காத்தாடி இணைந்த அலைச்சறுக்கு ஓட்டம், குறும்படகு ஓட்டம், நின்றபடி துழாவல் ஓட்டம் ஆகிய 5 விதமான கடல் சாகச போட்டிகளை நடத்த முடியும் என கூறப்படுகிறது. இங்கு மணப்பாடு கடல் பகுதியில் கடல் சறுக்கு விளையாட்டுப் போட்டிகள், கடல்சார் சாகச விளையாட்டுப் போட்டிகள் நடத்தப்பட்டுள்ளன.

கோவா கடற்கரை போல ஜில் என்ற குளிர் காற்று குளியலுக்கு ஏற்ற கடற்கரை என்பதால் மணப்பாட்டிற்கு சுற்றுலா பயணிகள் திரண்டு வந்து ஆனந்த குளியல் போடுகின்றனர். வாகன பார்க்கிங், கழிப்பிட நுழைவுக் கட்டணம் ஏதுமில்லாததால் பயணிகள் எந்தவித கட்டுப்பாடுமின்றி மணப்பாடு கிராமத்திற்கு வந்து செல்கின்றனர்.

திருச்செந்தூர் வருகை தரும் மக்கள் கட்டாயம் மணப்பாடு கடற்கரையை பார்த்து செல்லுங்கள்

தமிழ்நாட்டின் ராமநாதபுரம் மாவட்டத்தில் உள்ள ராமேஸ்வரத்தில் இருந்து 25 கிமீ தொலைவில் உள்ள சிறிய கடற்கரை கிராமம் ‘தனுஷ்கோடி’, அதன் பெயரைப்போலவே தமிழகத்தின் அல்லது இந்தியாவின் கடைக்கோடியில் உள்ளது என்று கூட கூறலாம். இங்கிருந்து இலங்கை வெறும் 15 கிமீ தொலைவில் உள்ளது.

.தமிழ்நாட்டின் பரந்த கடற்கரையில் மிகவும் கவர்ச்சியான அலங்காரங்களில் ஒன்று அழகிய தனுஷ்கோடி கடற்கரை. மிகவும் பிரபலமான சுற்றுலா மையமான தனுஷ்கோடி கடற்கரைக்கு உலகம் முழுவதிலுமிருந்து ஆண்டுதோறும் லட்சக்கணக்கான சுற்றுலாப் பயணிகள் வருகை தருகின்றனர். இந்த அழகிய கடற்கரை ஒருபுறம் மன்னார் வளைகுடா மற்றும் மறுபுறம் வங்காள விரிகுடாவால் சூழப்பட்டுள்ளது. தமிழ்நாட்டின் தெற்கு முனையில் அமைந்துள்ள இந்த அற்புதமான கடற்கரை தலமானது வரலாறு, தொன்மங்கள் மற்றும் அழகு நிறைந்த இடமாகும். 

கடந்த 1964-ம் ஆண்டு டிசம்பர் 23-ம் தேதி நள்ளிரவு புயலால் தனுஷ்கோடி என்ற நகரமே மொத்தமாக சிதைந்த நிலையில் 1964 நிகழ்வுக்கு பிறகு தனுஷ்கோடியில் மனிதர்கள் வசிக்க இன்றுவரை அனுமதி தரப்படவில்லை. ஆனாலும், ராமேஸ்வரம் வரும் சுற்றுலாபயணிகள் தவறாமல் தனுஷ்கோடிக்கும் சென்று அழிவின் எச்சங்களை காண தவறுவதில்லை.

மயிலாடுதுறை மாவட்டத்தில் வங்கக் கடலோரம் அமைந்துள்ளது தரங்கம்பாடி எனும் மீனவ கிராமம்.

இரண்டாயிரம் ஆண்டுகள் பழமையான சங்க இலக்கியங்களான புறநானூறு, அகநானுறு போன்ற இலக்கியங்கள் இவ்வூரை பொறையாறு என்று குறிப்பிடுகின்றன.

அக்காலத்தில் இவ்வூர் சிறந்த துறைமுகமாக இருந்துள்ளது.கி.பி 1620-ம் ஆண்டு டென்மார்க் நாட்டினர் தரங்கம்பாடியை, இந்தியாவில் தங்களது வர்த்தக மையமாக (டேனிஷ் கோட்டை) அமைத்தனர். இதுதான், இந்தியாவில் டேனிஷ் வர்த்தக மையத்தின் தலைமை இருப்பிடமாக அமைந்தது.

 400 வருடங்கள் பழமையாகியும் இன்றும் கம்பீரமாய் காட்சியளிக்கிறது இந்த டேனிஷ் கோட்டை.. இந்த கோட்டையில் செயல்படும் அருங்காட்சியகத்தில் 400 ஆண்டுகளுக்கு முன்னர்  டேனிஷ்காரர்கள், தமிழர்கள் பயன்படுத்திய பொருட்கள்  சிலைகள், பீங்கான், மரத்தாலான பழமையான பொருட்கள், டேனிஷ் அரசர்கள், ஆளுநர்களின் புகைப்படங்கள் டேனிஷ்கால பத்திரங்கள், போர்க்கருவிகள், 16ம் நூற்றாண்டில் தரங்கம்பாடி வந்த கப்பல் ஒன்றின் உடைந்த பாகங்கள், என ஏராளமான வரலாற்று சின்னங்களை பத்திரப்படுத்தி காட்சிக்கு வைத்திருக்கிறார்கள்

மேலும் இந்த கோட்டையின் தரைத்தளத்தில் சிறைச்சாலை, ஓய்வறைகள், பண்டகவைப்பறை, பீர், ஒயின் கிடங்கு அறைகளாக டேனிஷ்காலத்தில் பயன்படுத்தப்பட்ட அறைகளை, அப்படியே பழமை மாறாமல் புதுப்பிக்கப்பட்டு தொல்லியல் துறை கட்டுப்பாட்டில் இப்போதும் பராமரிக்கப்பட்டு வருகிறது.

தரங்கம்பாடி டேனிஷ் கோட்டை மற்றும் தரங்கம்பாடி கடற்கரையை நம் அனைவரும் தன் வாழ்நாளில் ஒருமுறையேனும் பார்க்க வேண்டும்.